L'aura en rumantsch

Quai n'hai anc mai dà: punctualmain per il 1. d'avust preschenta MeteoNews sin meteonews.ch l'aura er en rumantsch!

MeteoNews, il pli grond servetsch meteorologic en Svizra, preschenta a partir dal 1. d'avust sin il portal meteorologic da meteonews.ch l'aura er en rumantsch. Mintga di vegnan derasadas tut las datas meteorologicas e tut ils texts curts en rumantsch.

Peter Wick, CEO e proprietari da MeteoNews:

"Gia adina essan nus colliads profundamain cun la Svizra. Igl è noss martgà da chasa e nus prognostitgain l'aura en Svizra trais giadas il di per passa 15 regiuns. Uschia pudain nus ans occupar meglier da las cundiziuns regiunalas meteorologicas e climatologicas e preannunziar l'aura per noss clients e per ils visitaders da nossa pagina-web, tuttina nua ch'els èn e tuttina sch'els lavuran, fan u van en vacanzas.

Cun porscher nossa pagina-web er en rumantsch servin nus ussa tut las linguas naziunalas – e quai sco emprim portal meteorologic en tut il mund. Las translaziuns ha fatg la Lia Rumantscha (liarumantscha.ch).

I ma stat fitg a cor da resguardar las circumstanzas svizras originaras en noss bel pajas multifar e perquai avain nus amplifitgà noss portal meteorologic cun la quarta lingua naziunala. Igl è gia adina stà mes siemi da pudair porscher a las Rumantschas ed als Rumantschs ina pagina meteorologica. Punctualmain per il 1. d'avust, prest sco regal d'anniversari, va la pagina online."

meteonews.ch/rm